Ka nisur në Prishtinë projekti për vendosjen e kamerave të sigurisë me inteligjencë të lartë artificiale.

Kështu kanë bërë të ditur nga Komuna e Prishtinës për Arbresh.info.

Zëdhënësja e Komunës, Arlinda Kastrati,i ka thënë se kamerat e sigurisë fillimisht po vendosen në udhëkryqet kryesore.

“Projekti vendosja e kamerave të sigurisë ka filluar të realizohet dhe njëherit janë duke u vendosur kamerat e sigurisë fillimisht në udhëkryqet kryesore, sipas planit të hartuar nga Policia e Kosovës. Projekti është 3 vjeçar, por këtë vit do të realizohet faza e parë”, ka thënë Kastrati.

Ajo, gjithashtu bëri të ditur se pajisjet për monitorim do të instalohen në objektin e Policisë së Kosovës.

“Pajisjet për monitorim do të instalohen në objektin e Policisë së Kosovës, pasi që edhe monitorimi do të bëhet nga ana e Policisë së Kosovës”, ka thënë ajo.

Kryetari i Prishtinës, Përparim Rama më 3 janar të këtij viti kishte deklaruar se këto kamera janë me inteligjencë të lartë artificiale që nxiti reagime e huti tek shumë qytetarë, pasi nuk e kishin të qartë se çfarë do vëzhgohet nga kamera të këtij lloji.

“Këto kamera kanë një inteligjencë të lartë artificiale, prodhim amerikano – kanadez, të cilat do t’na ndihmojnë që përmes policisë, të bëjmë identifikimin e personave të cilët hedhin mbeturina, parkojnë në trotuare apo vende ku nuk lejohet”- kishte shkruar Rama.

Rama kishte potencuar se përmes këtij sistemi, do të identifikohen, në kohë rekord, personat e përfshirë në vjedhje, rrahje apo çfarëdo vepre.

Kurse, nga Komuna ishin shprehur se kërkesa për vendosje të kamerave të sigurisë ka ardhur nga Policia e Kosovës, e cila edhe ka të drejtën për instalim e monitorim të tyre.

Njoftimi për instalim të kamerave të sigurisë në kryeqytet pati nxitur reagime të ndryshme tek qytetarët, të cilët nuk e kishin shumë të qartë se sa do mund t’u cenohet privatësia në rast se kamerat janë me inteligjencë të lartë e matje biometrike.

Qytetarët nëpër rrjete sociale kishin konsideruar se me këtë lloj të kamerave mund të identifikohen edhe fytyrat e elementet biometrike më lehtë, duke e konsideruar si shkelje direkte të privatësisë.

Reagime kishte pasur edhe nga njohës të fushës së teknologjisë.

Megjithatë, mbetet të shihet se sa do të ndikojnë këto kamera në parandalimin e vjedhjeve, rrahjeve apo çfarëdo vepre penale në kryeqytet./Arbresh.info/Kujtesë Berisha/